Урыс-Кавказ заом фэгъэхьыгъэ гукъэкIыжь зэхахьэ Тахъутэмыкъуае щыкIуагъ

Гъэтхапэм и 9-м Адыгэ республикэм ит Адыгэ къуаджэм Тэхъутэмыкъуай дэт Адыгэ-ХьакIэщым Урыс-Кавказ заом фэгъэхьыгъэ гукъэкIыжь зэхахьэ щыкIуагъ.
Ащ кIэщакIоу фэхъугъэр Тэхъутэмыкъуае шъолъырым щыщ Адыгэ кIалэхэр ары. Зэхахьэм хэлэжьагъ Мыекъопэ къэлэ Хасэ – Черкес совет игъэцэкIэкIо куп.

Зэхахьэм къэкIуагъэхэр апэу хьакIэщым зэхэс щашIыгъ. Ащ Урыс-Кавказ заом Адыгэ лъэпкъым къиныгъоу къыфихьыгъэм тегущыIагъэх ыкIи непэ а Iофым узэрэдэлэжьэщт шIыкIэхэм тегущыIагъэх. Ащ нэужьым Тэхъутэмыкъуае дэт  Урыс-Кавказ заом хэкIодагъэхэм апае саугъэтым  кIохи заом хэкIодагъэхэм афэлъэIуагъэх. ЕтIанэ хьакIэщым къагъэзэжьи кIэщакIохэм мэл къурмэн ашIи зэхахьэм хэлэжьагъэхэр агъэщхагъэх. КIэухым зэдащтагъ мыщ фэдэ зэхахьэхэр тапэкIэ джыри къырагъэкIокIынэу.

КъэIогъэн фае, Тэхъутэмыкъуае дэт хьакIэщыр зыер ыкIи зыгъэлажьэрэр кIалэ ныбжьыкIэу КIытыжъ Аслъан. Ащ ригъусэхэу мы хьакIэщыр агъэлажьэ Тэхъутэмыкъуае шъолъырым щыщ Адыгэ кIэлэ ныбжьыкIэхэр.












-